MizoTaxi-a inziah luh hun pawtsei
State Transport Authority (STA) chuan thuchhuah siamin, MizoTaxi application-a inziak lut duh lirthei tan July 31, 2026 thleng hun hawn a nih thu a tarlang. MizoTaxi app hnuaia inziak lut tawh lirtheite chu MizoTaxi sticker bel a ni.
STA chuan, Mizorama sumdawnna lirtheia chuang ṭhinte'n sorkar bituk chuan/hman man (approved rate) dik tak an chawi theihna atana duan MizoTaxi app chu hman chhoh mek a nih thu a tarlang a, "Lirthei neitute leh mipui pawhin ṭangkai taka an hman beisei a ni," a ti.
MizoTaxi-a inziah luh theih hun chu July 1, 2026 khan tihtawp a ni tawh a, inziah luh hun hawng leh tura ngenna a awm avang leh, dilna hun hawn chhunga online dilna pending, hun tiam chhunga tihfel hman lohte a awm avangin inziah luh hun July 31, 2026 thleng hawn leh a nih thu STA chuan a tarlang.
STA tarlan danin, inziah luh hun hawn belh chhungin Aizawla two wheeler taxi, four wheeler taxi leh auto-rickshaw te chu MizoTaxi Office, Chaltlangah emaw, online-in emaw inziah luh theih a ni a; lirthei document felfai vek lo tan inziah luh theih a ni lo.
Aizawl mipui mamawhna phuhru turin online reng tur leh a tam thei ang ber tlan turin MizoTaxi-te chu ngen leh hriattir an nih thu STA chuan a tarlang bawk.