Health & Family Welfare Minister-in Kolkata-a damdawi-in pahnih a tlawh

Health & Family Welfare minister Lalrinpuii chuan July 11, Inrinni khan Kolkata-a Manipal Hospital leh Kalikata Road-a Kolkata Kidney Institute-te a tlawh a; damdawi-in hotute nen an inkawm bakah, Mizo damlo awmte a kan.

Manipal Hospital - Broadway a tlawhnaah minister Lalrinpuii hi unit director Kakali Mukherjee leh a thawhpuite'n an lo dawngsawng a; Mizoram aṭanga damlo tam zawk an enkawl theih nan hmalakna thar an neihte lo hrilhin, khumin a daih loh avanga day care centre an hawn belh aṭanga khum 35 chu Mizoram aṭanga damlo pantute tan bika an ruahman thu an sawi.

Damlo enkawlnaa tawnhriat nei Mizo nurse tam zawk thawk tura lak belh an duh thu Manipal Hospital hotute chuan an sawi a; Lalrinpuii chuan, August 2026 chhunga recruitment buaipui tura Mizorama zin turin a sáwm a, Mizoram aṭanga damlote duat tak leh uluk taka an lo enkawl avangin a lawm thu a hrilh.

Manipal Hospital hian India ramah damdawi-in 49 an nei a, chu'ng zinga panga chu MUHCS empanelled hospital a ni a; Kolkata-ah hian Manipal Hospital panga a awm.

Health Minister hian Kolkata Kidney Institute a tlawhnaah director Dr Pratik Das, senior consultant Dr Keshab Sil leh nephrologist Dr Amar Pratap Singh leh thawktu dangte'n an lo dawngsawng. Damdawi-in hi Mizoram aṭanga kal (kidney) thlak mamawhte tan ṭangkai taka hman a nih theihna turin inbiak chhunzawm zel an rel.

HFW Minister hian West Bengal sorkara Health minister Dr Sharadwat Mukherjee pawh a kâwm a; hriselna lama India hmarchhak lam state hrang hrangte'n ṭangruala hmalakho theih dan tur sawiin, minister-te inhmuh khawm theih dan kawng zawn ṭha an ti.

Lalrinpuii chuan, West Bengal sorkar tharah beiseina sang tak a neih thu sawiin, West Bengal-a hnam tenaute thlamuang taka an awm theih nan hma la turin Dr Sharadwat Mukherjee a ngen. Tun hnaia Subhasgram, West Bengal-a Kristiante biak-in suasam a nih chungchangah theihtawp chhuaha hma la tura ngenin, India ram chu sakhaw zalenna ram a nih angin khawi state-ah pawh sakhaw hrang hrang betute thlamuang taka an awm theih nan state tina sorkar hotute'n hma an lak a ṭul thu a sawi.

Health Minister hi Kolkata Mizoram House joint resident commissioner Zoremthara Ralte leh thawktu dangte'n an ṭawiawm a ni.