MP leh MLA-te'n Union Minister an hmu

Lok Sabha MP Richard Vanlalhmangaiha leh MLA pahnih - Lt Col. Clement Lalhmingthanga leh T Lalhlimpuia te chuan July 10, 2026 khan Union Road Transport and Highways minister of state Ajay Tamta chu a chenna inah an hmu a; Mizoram PWD-in project a thehluhte pawma sum pe chhuak turin an ngen.

Richard Vanlalhmangaiha chuan, NH-306A (km 45 - 102) tihchangtlunna atan Mizoram PWD-in cheng vbc 99.78 hû project an thehluh tawh chu sanction thuai tur leh, NH-108-a Langkai lui leh Teirei luia lei (permanent bridge) siamna tur DPR June 9, 2026-a PWD-in an thehlut nawn leh tawh chu sanction turin a ngen a ni.

PWD Minister puitu MLA T Lalhlimpuia chuan, Aizawl-Thenzawl-Lunglei (ATL) Road chainage 147.200 aṭanga Sazaikawn inkara Lunglei Western Bypass Road siamna tur project cheng vbc 213.60 hu thehluh tawh chu phalna (sanction) pe turin a ngen.

T Lalhlimpuia sawi danin, Lunglei Western Bypass Road siam tum chu km 28.6-a thui tur a ni a, ATL road aṭanga pêngin, Lunglei Sazaikawn piahah NH-302 (Lunglei-Tlabung) kawng pawh tur a ni. Lunglei Western Bypass Road siam a nih chuan, Lunglei khawpui chhung hêlna ṭangkai tak a nih dawn bakah, Lawngtlai district, Siaha district leh Tlabung leh Chawngte lam kawng a titawi sawt dawn tih MLA chuan a sawi.

Lunglei Western Bypass Road atan hian NHIDCL-in detailed project report (DPR) an thehlut tawh a; DPR chu a rang lama pawma sum pek chhuah a nih theih nan hma la turin T Lalhlimpuia chuan Ajay Tamta a ngen a ni.

T Lalhlimpuia chuan, NH-302 (Hrangchalkawn aṭanga Lunglei) zauna mekah Theiriat khuaa leimin vanga mipui harsatna chungchang a thlen bawk a; Theiriat kawng chung helna tur kawng lailawk siam mek chhunzawmna tur project cheng nuai 110.49 hû thehluhah theihtawp chhuahpui turin a ngen bawk.