Chhiatna thleng thei laka fimkhur turin Aizawl Bawrhsapin district mipui a chah

Aizawl District Disaster Manage-ment Authority (DDMA) chairman Lalhriatpuia, Aizawl DC chuan July 11, 2026 khan hriattirna a tichhuak a; tun hnaia ruahsur nasa leh fûr inṭan chhoah Aizawl district hmun hrang hrangah leimin, lung tla, lungrem chim leh chhiatna thleng dangte a awm avangin fimkhur turin mipui a chah.

Aizawl DDMA Chairman chuan, "Veng/khaw tina village/local level Disaster Management Committee-te pawh mahni veng/khua ṭheuhah a ṭul anga hma la tura ngen leh hriattir kan ni e," a ti.

Leimin hlauhawmte ruahtui tlak laia a ṭul anga khuh hul tur a nih thu tarlangin Bawrhsap chuan, "In tinin tui luankawr, tuichhe paihna mumal taka siamin tihfai tur a ni. Septic tank/soak pit leak awm leh awm loh enfiahin, a awm a nih chuan a rang lama thawm ṭhat tur a ni a, thing leh mau, thli leh ruahin a tihtluk mai theih, chenna in leh electric wire delh mai theite chu a ram neitute'n Forest department-te beráwnin kih/a zar thlak tur a ni," a ti a; ruahsur nasat laiin tui hmun leh kawr hnaiah kal lo turin mipui a chah.

Aizawl DDMA Chairman chuan, leimin/lung tlak theihna zawna kawng hmangtu lirthei leh kea kalte fimkhur turin a chah a, "Sorkarin hmun him lo a tih, kaltlang phal lohna hmunah tumah kal tlang luih loh tur a ni. Lungrem chim mai hlauhawm leh tui dawng tam zawna awmte leh a thlang kawng hmangtute fimkhur tur a ni. Mimal ram chhunga leimin veng thei tur chi hnimte sâm fai loh tur a ni a, leimin ven nan mimal ram àwlah thing, a zung lei tinghet thei chite phun uar tur a ni," a ti bawk.