Police-te'n kum chanve chhungin cheng nuai 41,466 hû ruihhlo man

Mizoram Police chuan kumin kum chanve, January 1 - June 30 chhung khan ruihhlo cheng nuai 41,466 hû an man a; ruihhlo an man kaihhnawihah mi 312 manin, heroin vanga man an tam ber.

Police tarlan danin, January - June, 2026 chhung khan Mizoram Police-te'n ruihhlo an man zawng zawng kaihhnawiah hian thubuai 219 ziak lutin, mi 312 an man. Ruihhlo vanga mi an man zinga 211 chu heroin vanga man an ni a, methamphe-tamine vanga man mi 62-in an awm.

Kum chanve chhunga ruihhlo kaihhnawiha man mi 312 zinga 255 chu India khua leh tui an ni a, a bak mi 57 chu ram dang mi an ni.

Mizoram Police chuan, January 1 - June 30, 2026 chhunga ruihhlo tam tham tak an man chuan police-te thawhrimna a tihlan thu tarlangin, "Kan ram leh hnam humhimna atana sorkar, VC, YMA leh NGO hrang hrangte'n ruihhlo do beihpui kan thlaknaah theihtawp min chhuahpui a, kan lawm tak zet," an ti a, ruihhlo tawlhrûk report-ah ṭan lakpui zel turin Mizoram mipui an sáwm.