KHAWTHLIR

Thisen pe

July 11, Inrinni khan KṬP, Leitan South Branch chuan Synod Hospital tan thisen unit 45 an pe a, petute mipa 36 leh hmeichhia pakua an ni. Salvation Army Youth, Southern Division pawhin Lunglei Civil Hospital tan thisen unit 52 an pe a, petute mipa 46 leh hmeichhia paruk an ni.

Luiah tla hlum

Lalrinpuia (27), Rotlang West, Lunglei district chu July 10, 2026 chhun dar 11 vel khan Phairuang luiah a tla a, zawn mek a ni. Lungsen aṭanga thu dawn danin, Lalrinpuia hi a naute pahnih nen feh turin an kal a, an lo thleng turin Phairuang lui dai kai a ngai a; a naute pahnih chu an hleuh kai mai laiin, Lalrinpuia chuan tui a len avangin a hleuh kai zo ve ta lo a, tuiin a la a ni. Lalrinpuia hi Rotlang West leh ṭhenawm khuaa mi tlawmngaite'n an zawng nghal a, nimin tlai thleng khan hmuh a la ni lo. A nupui Lalrammawii leh an fanu kum 3 mi a kalsan a ni.

Heroin man

Assam Rifles chuan July 10, 2026 khan Champhai Zote huam chhungah lirthei pakhata chuang mi pali hnen aṭangin heroin gram 63.6 an man. Heroin leh a neitua puhte hi Champhaia Excise & Narcotics department hnenah an hlan chhâwng a ni.

Summer Sports

Mizoram páwn khaw hrang hranga lehkha zira awmte'n nipui chawlh hmanga Mizorama an haw laia intihhlimna an neih ṭhin, Summer Sports chu chawlhkar liam ta khan R Dengṭhuama Hall-ah buatsaih a ni a; July 11, Inrinni khan khâr niin, MYC chairman Malsawmzuala Ralte-in a hmanpui. Summer Sports 2026 hi Shillong MSU-in an huaihawt a, India rama khawpui pariata zirlaite telin, Shillong MSU an champion a ni.

Lok Adalat-in case 15 chingfel

Lunglei District Legal Services Authority chuan July 11, Inrinni khan Lunglei District Court building-ah Lok Adalat an hawng a, thubuai 34 ngaihtuahin, thubuai 15 an chingfel. Lok Adalat-ah hian bench pakhat siam a ni a, civil judge (senior division-II) Lalthansiami Hnamte-in kaihruaiin, advocate B Laldinpuia leh social worker Chawngchhuana Chawngthu te an ṭhu. Thubuai 34 ngaihtuah niin, chu'ng zinga 15 chu chinfel a ni a, thubuai chinfel bika leiba inṭhìn zat chu Rs 59,70,954 a ni.