Aizawlah Zo Fair buatsaih ṭan a ni

Ministry of Tribal Affairs hnuaia Tribal Cooperative Marketing Development Federation of India (TRIFED) leh Mizoram Cooperation department ṭang dun chuan nimin aṭang khan Dawrpui Multipurpose Hall-ah 'Zo Fair' (Aadhi Bazaar) an buatsaih a, chief minister Lalduhoma'n a hawng.

Zo Fair-ah hian India hmarchhak state hrang hrang aṭangin stall 13 leh Mizoram aṭangin stall 12 siam a ni a, kut themthiamte'n an thilsiamte an pho chhuak. Stall 25 zingah hian Tribal Food Cuisine stall pahnih a tel a; a dangte chu kuta tah (textile) zawrhna, mau aṭanga siam te, ei tur lam leh natural product zawrhnate a ni. Fair hian July 18, 2026 thleng a awh dawn.

Chief Minister chuan, hmarchhak mipuite'n lehkhabua an chanchin ziaka an dah hma aṭang tawhin puantah leh thiamhnang dehah chanchin ṭha tak an lo neih tawh thu a sawi a, "Vawiina he bazara kan thil pho, kan kutchhuakte en hian, kum za tam tak chhunga kan lo inhlan chhawn tawh themthiamna leh kan nunphungte kan hmu tel a ni," a ti.

Khawvel changkanna avangin khawl hmangin hmanraw tam tak dehchhuah a ni tawh tih sawiin Lalduhoma chuan, "Nimahsela, heng kan hnam thil, kan kutchhuakte hi chu vawiin thlengin kan dehchhuah dan a la ngai reng," a ti a, hnam zia tah tel a nih avangin hnam chanchin puangtute an nih thu a sawi.

CM Lalduhoma chuan, kut themthiamte chu hnam tan an hlut avangin bànsan lo turin a chah a, "In thiamna hi in ngainêp mai ang tih te a hlauhawm. Kan kut chhuakte hi kan tana kan siam ni mah se, min rawn duhpuitu an tam chho zel a, a hralhna a ṭha tial tial dawn," a ti.

Chief Minister chuan, Mizoram páwn aṭanga Zo Fair-a telte chu hun nuam tak hmang tura duhsakna a hlan a; Aizawl khawpui fang a, mi chengte tlawh kual turin a chah bawk.

Khualzahawm Prof. Lalnilawma, Rural Development & Administration minister pawhin thu sawiin, cooperative movement chu ram dangah mi tam takin an hlawhtlinpui tawh tih a sawi a, "Mizoramah pawh hlawhtlinpui tumin ke kan pen mek. Viksit Mizoram 2047 thleng tur hian thingtlang khaw tê ber thlenga khaw intodelh kan nih a ngai," a ti.