KHAWTHLIR

CYMA-in ṭanpui

Central YMA chuan tun hnaia tuilian leh leimin vanga harsatna tawkte hnenah ṭanpuina a hlan. CYMA hian leimin vanga khualzin tangkhangte ei tur buatsaihtu Bualte Branch YMA hnenah Rs 10,000 leh Ṭhaizawl Branch YMA hnenah Rs 5,000 an pe a; Khawthlangtuipui lian tuartute chhawmdawlna atan Khawthlangtuipui Group YMA hnenah Rs 50,000 an pe bawk.

Heroin man

Assam Rifles chuan July 12, Pathianni khan Ngopa huam chhungah lirthei pakhat aṭangin heroin gram 337 an man a, a neitua puh mi pahnih an man nghal. Heroin hi Mizoram Police hnenah an hlan chhâwng a ni.

SIR 2026 training

Chief Electoral Officer (CEO) pisa chuan nimin khan IPR Lianchhiari Rûnah Mizorama electoral registration officer leh assistant electoral registration officer te pualin Special Intensive Revision 2026-a hming paih, thun thar leh siamṭhat huna an mawhphurhna zirhona an buatsaih. Zirhona hi joint CEO Ethel Rothangpuii'n a kaihhruai a; ERO leh AERO te chu ram leh hnam hmangaihna thinlung pu chunga an mawhphurhna hlen turin a chah.

Sikulah TV pe

AMC Ward-XIV corporation Roy Lalhriatpuia chuan nimin khan Khatla Primary School hnenah flat TV a pe. Roy Lalhriatpuia hi nimin zing khan Khatla P/S-ah kalin, headmaster VL Zampuii hnenah flat TV a hlan a ni. VL Zampuii chuan, Roy Lalhriatpuia chungah an lawm tak zet thu leh, TV chu naupangte zirna tihhmasawn nan leh zirna tihchangtlun nan a ṭangkai dawn thu a sawi.

Vawk lak khap

Saitual district magistrate Srinivas Sadi chuan thupek tichhuakin, Saitual khaw chhungah ASF hri a lên avangin Saitual khaw chhung aṭanga vawk leh vawksa lak chhuah khap a nih thu a puang. ASF hri lênna aṭangin Saitualah vawk leh vawksa lak luh phal a nih loh thu leh vawk damlo hralh leh talhte khap a nih thu a tarlang bawk.