VB-GRAMG atana inbuatsaih dante Sorkar laipui aiawhte'n an endik mek

Sorkar laipuia Ministry of Rural Development inspection team chuan Mizorama VB-GRAMG inbuatsaihna an rawn enfiah a; nimin khan Rural Development & Administration minister Prof. Lalnilawma pisaah RDA department hotute nen an inkâwm. Minister chuan, VB-GRAMG hmang turin Mizoram a inpeih tawh thu a sawi.

Ministry of Rural Development hian state hrang hranga Viksit Bharat - Guarantee for Rozgar & Aajeevika Mission - Gramin (VB-GRAMG) atana inbuatsaih dan enfiah tur team dinin, state tinah an tir chhuak a; Mizoramah pawh director Ajay Kumar, under secretary Prince Tomar leh section officer Ankul Goyal te an rawn kal a ni.

Enfiahtute nen an inkawmnaah Prof. Lalnilawma chuan, Mizoram chu VB-GRAMG hmang turin a inpeih tawh thu a sawi a; July 8, 2026 khan Mizoram tan VB-GRAMG tlangzarh a nih thu leh state, district leh block orientation neih a nih tawh thu sawiin, "VB-GRAMG 2026 hi India rama peih hmasa ber kan ni," a ti.

RDA secretary R Zarzosanga chuan, VB-GRAMG kalpui turin nasa taka am inbuatsaih thu te, Mizoram chuan VB-GRAMG atan Head of Account hrang a neih tawh thu te, state matching share atana budget provision dah a nih tawh thu te, RBI account peih a nih tawh thu te, state link scheme pawh IFMIS-ah dah a nih vek tawh thu te, DBT SPARSH tan inbuatsaihna an zawh tawh thute a sawi.

Ministry of Rural Development aiawhte hian Mizoram sorkarin harsatna an tawh, MGNREGA hnuaia administration component cheng vbc 6.83 la pek chhuah lohte chu pek chhuah thuai a nih tur thu Minister an hrilh.

Inspection team hian vawiinah Mamit district an tlawh dawn a, MGNREGA hnuaia hnathawh tawh leh VB-GRAMG hnuaia thawh mekte an en dawn bakah, Gramin Rozgar Guarantee holder-te an kâwm dawn a ni.