Thingtlang H/S-a internet ṭha zawk pe turin Education leh BSNL ten MoU an ziak

School Education department leh Bharat Sanchar Nigam Limited (BSNL) chuan thingtlang (rural area)-a high school-te high-speed internet pekna turin nimin khan thawhhona thuthlung, memorandum of understanding (MoU) an ziak a, School Education minister Dr Vanlalthlana'n a kaihruai.

MoU-ah hian School Education secretary K Lalthawmmawia, additional secretary Zothantluangi leh Samagra Shiksha state project director C Lalthanzira ten hming an ziak a; BSNL aiawhin general manager BP Meena leh deputy general manager Biakthianghlima Chenkual ten hming an ziak.

Thuthlung hi kum nga chhung awh tur a ni a; a tum ber chu - sorkar laipui ruahmanna Amended Bharatnet Program (ABP) hnuaia Digital Bharat Nidhi (DBN) incentive scheme kaltlanga thingtlang H/S-te fibre technology to home hmanga internet chak zawk pek a ni.

Dr Vanlalthlana chuan, khawpui leh thingtlang kilkhawra zirlaite'n thiamna inang tlâng an dawn theih nan hma an lak thu a sawi a, "Internet leh technology avanga zirnaa inthlauhna awm mek tihbo nan thuthlung hi a pawimawh. Tunlaiah zirna kaihhnawiha inrelbawlnaah internet a pawimawh avangin real-time data monitoring leh online portal dangte hlawhtling taka theh luh a nih theih nan leh, zirtirtute thiamna tihhmasawn nan sikulte'n internet rintlak an mamawh a ni," a ti.

School Education department leh BSNL hotute chuan, thingtlang sikulte thuam chak a, zirlaite leh zirtirtute'n MoU kaltlangin digital khawvel nen inthlun zawmna ṭha zawk an neih theih ngei an beisei thu an sawi.