Khawzawl aṭangin nihawi tél vailiam

Khawzawl district-ah nihawi (sunflower) aṭangin têl litre 2,000 her chhuah a ni a; nihawi têl khaw hrang hranga thawn chhuah turte chu nimin khan Khawzawl district bawrhsap K Vanlalṭhiana'n nimin khan District Agriculture Office tual aṭangin a vailiam.

Sorkar thuchhuah tarlan danin, sorkar laipui hnuaia NMEO-OS leh RAD scheme hnuaiah kum 2025-26 chhung khan Khawzawl district-ah nihawi (variety KBSH 90) chìn a ni a; zaù paruk - Rabung, Sialhawk, Biate, Khawzawl, Khawhai leh Kawlkulhah te chìn niin, mi 120-in buh ṭín 98 hmunah an ching. Khawzawl, Rabung leh Sialhawkah nihawi herna khawl bun a ni a, kuminah têl litre 2,000 her chhuah a ni.

Khawzawl Bawrhsap chuan, nihawi chìn leh a têl her chhuak tura Khawzawl District Agriculture Office, KVK leh loneitute thawhrimna fakawm a tih thu a sawi a, "Loneitu 120 laiin ngaihtuahna thar leh smart tak neia nihawi chîng a, a têl an her chhuak thei hi a lawmawm a, Khawzawl district an chawimawi a ni," a ti.

Bawrhsap hian nihawi têl thar chhuak tam mi pathum - Khawlnunpuia, Biate (litre 237), R Lalrualliana, Biate (litre 204) leh Lalhriatpuia, Biate (litre 149) te hnenah lawmman a hlan a ni.