Leiminin chenna in pahnih a hnâwl

Nimin zing dar 5 vel khan Ṭawipui South-ah leiminin F Lalhredika leh Jethra te chenna in leh Esther Hotel leh dawr a hnâwl a; mihring thi leh hliam an awm lo. Leimin hian NH-54 kawngpui a hnawh ping vek a, nimin tlai thleng khan lirthei kaltlang theih a ni lo.

Thu dawn danin, leiminna hmunah hian tun hnaiah nasa vak loin lei hi a min tawh a, July 13, Thawhṭanni zan dar 11 vel aṭangin lei a che leh a, nimin zing khan nasa takin a min ta a ni. A hmain lei a lo chêt tawh avangin a bul hnaia awmte bungrua chu an lo thiar chhuak tawh a, khawtlang hruaitute'n hmun him lamah an awmtir a ni.

Kawngpui hnawhtu leimin chu kawng thlang lama hnâwl thlak turin rêl a ni tawh a; mahse, mithiamte'n leivûng paih chu a him rih loa an sawi avangin paih theih a la ni lo. Hei vang hian lirthei kal theiha kawngpui a tlang hun tur hriat theih a ni lo a ni.