KHAWTHLIR

PUC-in thisen pe

Pachhunga University College NSS chuan nimin khan Civil Hospital, Aizawl tan thisen unit 158 an pe. Thisen pek hi PUC Seminar Hall-ah buatsaih a ni a, mipa 103 leh hmeichhia 55 ten thisen an pe a ni. MZU hnuaia college-te'n July 10, 2026 khan kum 2026-27 atan class an ṭan a, Civil Hospital, Aizawlin thisen an mamawhna a sàn avang leh, AVBD ngenna angin PUC hian nimin khan blood donation camp an huaihawt nghal a ni.

Ruihhlo dona hlan

Ṭhalai Kristian Pawl, Mission Vengthlang Bial chuan ruihhlo donaa a ṭula hman atan nimin khan Central YMA hnenah Rs 29,720 an hlan. Pawisa hi CYMA president R Lalngheta'n a dawng a, ṬKP, Mission Vengthlang Bial chungah an lawmthu a sawi.

HIV endik rêl

Lawngtlai District AIDS Prevention Control Committee chu nimin khan Mobilization for AIDS Suraksha chungchangah district bawrhsap Donny Lalruatsanga hoin an ṭhukhawm. July 2026 chhungin Bungtlang South, Buangpui NG, Cheuràl, Ràwlbûk, Zochachhuah leh Chawngte khuaah te HIV vei leh vei loh endik an rêl a; Lawngtlai district-a sumdawnna lirthei khalhtute tan free clinic buatsaih an rêl bawk.

Generator pe

Zothan Auto Works chuan rîkrum thila hman atan nimin khan Central YMA hnenah generator, flood light leh battery spare pakhat ṭheuh an pe. Thilpek hi Aijal Club-ah inhlan a ni a, Zothan Auto Works neitu Zothantluanga'n CYMA assistant secretary SF David Ngursangzuala hnenah a hlan a ni.

Forest dan hrilhfiah

Kawrthah Forest Division chuan July 13, Thawhṭanni khan Thinghlun khuaah outreach programme an hmang. Kawrthah DFO Karthikeyan V hoin thawktute'n 'Kan ramngaw kan nunna' tih leh 'Kan ramngaw hi kan nun khawchhuahna a ni' tih thupuia hmangin khawtlang mipuite forest dan leh hrai an hrilhfiah a ni.

Ruihhlo do sawiho

Lawngtlai bawrhsap Donny Lalruatsanga hoin July 13, Thawhṭanni khan District NCORD Committee chuan ruihhlo do kawnga hmalakna leh hmachhawpte an thlirho. Bawrhsap chuan, tun dinhmunah Lawngtlai khawpuia ruihhlo lut a tlem tawh thu sawiin, "Hei hi sorkar leh NGO-te inkarah thawhhona ṭha a awm vang a ni," a ti a; Operation Jericho leh Drug Free District Campaign kalpui mek a hlawhtlin theih nan theihtawp chhuah turin mipui a sáwm a ni.

Lathe Cachine training buatsaih

Mizoram Youth Commis-sion leh Mizoram University Incubation Centre chuan nimin khan MZU Incubation Centre-ah 'Lathe Cachine Training' an buatsaih a, MYC chairman Malsawmzuala Ralte-in a hawng. Malsawmzuala Ralte chuan, ṭhalaite hmakhua ngaiin a thlawna lathe machine zirna buatsaih a nih thu sawiin, tih tak takna nen an hma lam huna eizawnna tlak thiamna neih tum turin kalkhawmte a fuih.

Govt Press siam rem dan tur rel

Lunglei District Autho­rity for Mizoram Govern­ment Land Pooling & Management Scheme chu an chairman Navneet Mann, bawrhsap kaihhruaiin nimin khan an ṭhu. Lunglei District Court sakna tur ram mamawhna avanga Mizoram Govern­ment Press awmna, Lunglawna Printing & Stationery hmunhma leh building nena District Court atana luah mek building leh hmunhma inthleng leh siamrem rawtna chungchanga hmalaknate sawiho a ni a, ruahmanna hrang hrangte chak zawka bawhzui an rêl.