Zirlaite himna leh an chanvo humhalh kawngah thawhho rêl

School Education minister Dr Vanlalthlana chu nimin khan a pisaah Mizoram State Commission for Protection of Child Rights (MSCPCR) hotute nen an inkâwm a, zirlaite himna leh an chanvo humhalh kawngah thawhho zel an rêl.

Dr Vanlalthlana chuan, MSCPCR-in sikul leh hostel-te an endik ṭhin leh naupangte himna atana POCSO Act chungchang an zirtir ṭhinte chu zirlaite tan a pawimawh thu a sawi a, "MSCPCR-in sikul hostel leh canteen-a ei leh in hrisel lo chungchangah te leh zirlai naupangte himna in endik ṭhin hi School Education department chuan a thlawp tlat a ni," a ti.

MSCPCR chu an hmalaknate chhunzawm zel tura chahin Education Minister chuan, an hmalakna chuan zirlai naupangte tan zirna-in him zawk leh nuam zawk a siam ngei a beisei thu a sawi bawk.

Inkawmnaah hian zirlaite rilru leh taksa hriselna bakah, sikula naupangte himna (safety protocol) pawi-mawhna sawiho a ni a; MSCPCR hmalakna hi School Education inkaihhruaina (guide-lines) leh National Education Policy 2020 nen a inmil avangin School Education department leh MSCPCR chu chak zawka thawh dun zel ni se, an ti.