Roll ennawnah dik taka thil ti turin YMA-in ERO leh ERO-te an ngen

Central YMA chuan, Electoral Roll Special Intensive Revision (SIR) 2026 kal zela Electoral Roll-a inthun leh paih dilna hun hawn mekah, khua leh tui dik tak ni lote thun an nih loh nan dik taka thil ti turin thuneitute an ngen a; mahni huam chhung ṭheuhah hma la turin YMA branch-te leh pawl dangte an ngen.

CYMA chuan nimin khan thuchhuah siamin, SIR 2026-ah dik lo taka thil tih a nih chuan khua leh tui dik tak ni lote Electoral Roll-a luh theihna a nih thu tarlangin, "SIR buaipuitu ERO leh AERO-te theihtawp chhuah turin kan ngen a, ram leh hnam himna tur a ni tih hriain, dik leh fef taka thawk turin kan beisei a, kan ngen a ni," an ti.

Electoral Roll-a la awm ngai lote tan inthun luh dilna hun hawn mek a nih thu sawiin CYMA chuan, "Hearing neih hunah khua leh tui dik takte chauh an luh theih nan hearing kalpui turin ERO leh AERO-te kan ngen a, hearing-ah hian YMA branch-te leh kan thawhpui NGO-te ṭhahnemngai taka tel turin kan ngen," an ti a; ngaihtuahna dang hmang lo turin political party-te an ngen bawk.

CYMA chuan, July 4, 2026-a SIR 2026 Draft Electoral Roll tihchhuah chu ngun taka an zir chian thu sawiin, "Constituency ṭhenkhatah SIR neih hruhnung ber kum 2005-a Roll-a awm zat leh mihring pun dan nena chhûtin, enumeration form thun luhah thil ni thei lo a awm niin kan hria a, mapping-ah dikhlel deuha thil tih a awm niin kan hria. Hemi chungchang hi thuneitute hnenah en ṭha leh tura ngenna thlen kan tum," an ti.