National Youth Parliament Competition-ah Mizoram aiawhtu EMRS Ngopa pakhatna

Sorkar laipuia Ministry of Parliamentary Affairs-in India rama Eklavya Model Residential School (EMRS)-te tana National Youth Parliament Competition a buatsaih EMRS, Ngopa chu Mizoram aiawhin an tel a, pakhatna an ni.

EMRS National Youth Parliament Competition-ah hian India ram pum chu zone thumah ṭhen a ni a, Mizoram chu Zone I-ah a awm. Zone I-a awmte hi zone thumah ṭhen leh niin, Mizoram chu North East Region-ah a awm a; March 2026-a NE Region intihsiaknaah pakhatna an lo la tawh a ni.

NE Region-a pakhatnate chu nimin khan EMRS Kumulung, Tripura-ah an intihsiak a, EMRS Ngopa bakah, East Region aṭangin EMRS Sikkim leh North West Region aṭangin EMRS Jharkhand an tel a; EMRS Ngopa hi pakhatna an ni. EMRS Ngopa hi national level-a inelnaah an tel leh ang.

National Youth Parliament hi Parliament rorel dan kalphung a taka chan chhuahna a ni a; zirlaite'n mipui rorelna democracy te, ram rorel dante leh khawtlang inrelbawlna chiang zawka an hriat theihna tura duan a ni.

Mizoram EMRS Society hnuaiah hian sikul (functional) 11 awmin, zirlai 2,852 an awm mek a; EMRS Ngopaah hian zirlai 303 an awm a ni.