Chhawmdawlna pe turin ngen

Lunglei bawrhsap Navneet Mann, District Disaster Management Authority chairperson ni bawk chuan, Lunglei district-a National Highway 54A leh 302-a leimin leh kawng pingin a nghawngte tan ṭanpuina ruahman tur leh kawngpui ṭha a awm theih nana chak zawka hma la turin NHIDCL hotute a ngen.

Navneet Mann hian nimin khan Mizorama NHIDCL Executive Director hnenah lehkha a thawn a; Lunglei district-a Theiriat, Bualte, Ṭawipui South leh hmun ṭhenkhatah leimin nasa tak avangin mipui leh khualzin eng emaw zatin harsatna an tawh mek thu a tarlang.

Lunglei DC office aṭangin kawng siam zo thuai turin vawi tam tak hriattirna pek ni mah se, tun thlengin hmasawnna hmuh tur a la tam loh thu DC chuan a tarlang bawk a; NHIDCL chu leimin vanga harsatna tawkte leh harsatna tâwkte buaipuitu khawtlang tan a rang lama chhawmdawlna pe turin a ngen a ni.