Ram veng him turin kan police-te ka ring tâwk che u - Home Minister

16th July, 2026

Mizoram Police Service (MPS) officer thar, probation training zote chuan nimin khan Home minister K Sapdanga a pisaah an hmu a; Mizoram veng him turin Mizoram Police a rin tâwk thu Home Minister chuan a lo hrilh.

K Sapdanga chuan, MPS chu nih a tum ve ṭhin a nih thu sawiin, "Ka thiamna leh ka ruangámin a tlin tâk loh a ni a, MPS officer thar mi pariat chhuanawm tak kan nei che u hi ka lawm tak zet zet. Hna in thawhna kawng engkimah rintlak, Mizoram mipui tana innghahna tlak leh thlamuanpuiawm in nih ngei ka beisei tlat a ni," a ti.

MPS officer tharte chu Mizoram leh mipui thlamuana veng him tura a rin tâwk thu sawiin Minister chuan, "In theihna zawng zawng he ram tana hlan tur leh ruihhlo leh a kaihhnawihah fihlim ngei turin ka beisei tlat che u. Tunlaiah policing hna hi a technical em em a, kan thiamnate enin technical lamah pawh chhuanawm tak tak hlir in ni tih ka hria a ni," a ti a, MPS tharteah beiseina sang tak a neih thu a sawi.

Home Minister chuan a rilru tinatu sawiin, "Mizoram Police-a ka rilru tina ṭhin em em chu - ram veng himtu tura sorkarin a lak, a hun loa ruihhlo leh a kaihhnawih vanga kan invui liam tam lutuk hi a ni," a ti.

K Sapdanga chuan, college an kal lai chuan police hming lam rîk ngawt pawhin an thlamuang ṭhin tih sawiin, "Thubuai hrang hrang an chhui chhuak zung zung ṭhin," a ti a; hna an thawhnaah mipui rawngbawl tura thlan leh zir chhuak kan ni tih vawng reng a, hna an thawh chhan mipuiin an thlamuanpui em tih ngaihtuah reng chunga thawk turin a beisei thu a sawi.

K Sapdanga chuan, Mizoram Police-in kumin 2026 hi Year of Discipline-ah kan puang thu sawiin, "Kan sâwtpui viau turah kan inbeisei," a ti a; fitness leh discipline-ah hma hruaitu ni zel tura a beisei thu MPS officer tharte a hrilh.

Home Minister chuan Mizoramin Administrative Training Institute chhuanawm tak a neih thu sawiin, an training chhunga an zirte chu ṭangkai taka hmang tura a beisei thu a sawi. Inkawmnaah hian MPS tharte chuan zawhna an neihte Home Minister an zawt a ni.