KHAWTHLIR

MPCC Black Day

Mizoram Pradesh Cong-ress Committee chuan, Foreign Contribution Regulation (Amendment) Bill (FCRA) leh India rama Kristiante tihduhdahna duh loh lantir nan July 21, 2026 chhun dar 12 khian Mizoram hmun hrang hrangah 'Black Day' hman an tum tih an tarlang. MPCC chuan, "Kan ram, kan hnam leh sakhua tana pawi thei FCRA Amendment kaltlangpui tumna hi theihtawp chhuahin kan do zel dawn a ni," an ti.

Sangau lamah kal turin chah

Lunglei additional DC Zoramdini chuan hriattirna tichhuakin, Ṭawipui South-a leiminin NH-54 kawngpui a hnawh pin chu thenfai mai theih a la nih loh thu a tarlang a; Lawngtlai/Siaha lama kal ngaite chu Sangau lam kawnga kal rih turin a chah.

Fûrpui laia inrin dan tur sawiho

Lawngtlai bawrhsap Donny Lalruatsanga hoin nimin khan District Disaster Management Authority an ṭhukhawm a; fûrpuia chhiatna thleng theiah inrálring renga awm leh chhiatna thlengah khawtlang hruaitute nen thawkho zel tura hmalak an rêl. Chhiatna a thlenin, a rang thei ang bera hmalak ni se, an ti a; chumi atan chuan zonal officer leh a kaihhnawih department hotute'n a hmunah kal chilh ṭhin se, an ti bawk.

SWM Rules rêl

Saitual district bawrhsap Srinivas Sadi kaihhruaiin nimin khan Special Cell on Implementation of Solid Waste Management Rules, 2026 an ṭhukhawm. Bawlhhlawh sawngbawlnaa Saitual district-in hma a lak tawh dan leh SWM Rules 2026 behchhana bawlhhlawh sawngbawl tura hmalak zui dan turte an rêl a ni.

Congress vice president ruat belh

Congress party (Mizoram Pradesh Congress Committee) president Lal Thanzara chuan nimin khan MPCC vice president atan mi pathum a ruat thar. MPCC vice president atana ruatte chu - minister hlui pahnih Zodintluanga Ralte leh H Rohluna bakah, John Siamkunga te an ni. MPCC hian vice president pathum an nei sa a, heti hian vice president paruk an nei ta a ni.