Thuneitute'n Ṭawipui South leimin an enfiah

Lunglei District Disaster Management Authority (DDMA) hnuaia zonal officer Grace Lalremdiki Sailo hoin Joint Inspection Team-te'n Ṭawipui South-a leimin vanga kawng pinga hmalak dan July 14, 2026 khan a hmunah an enfiah a; lung leh lei a la tlak belh reng avangin kawng hnawhtu leivûng then rih loh turin an ti.

Ṭawipui South-ah hian hmar lam aṭanga luhna Esther Hotel bulah July 13, 2026 zan dar 11 vel khan leiminin chenna in pathum leh dawr tê a hnâwl a, National Highway-54/2 a hnawh ping bawk.

Inspection Team-ah hian Geology & Mining assistant controller of mines Lalnunsiama Fanai, ABCI general manager Akhilesh Singh leh sorkar official dang te, Ṭawipui South VC leh YMA aiawh te, DDMA Quick Response Team (QRT) member-te leh Police aiawhte an tel.

Lei min dan leh min belh thei a la awm leh awm loh te, lirthei kal theih tura kawngpui tihtlang dan turte enfiah a ni a; leilung a ngheh tawk loh avang leh, lung leh lei a la tlak belh reng avangin leivûng paih fai rih loh mai ni se, an ti.

Inspection Team hian leimin vanga in leh lo chhia chhungkuate an tlawh nghal a, sorkar aṭanga ṭanpuina leh chhawmdawlna awm theite ruahmanin an bawhzui nghal. Khualzin tangkhangte ei ter siamsakna leh senso dang phuhruk nan Lunglei DDMA aṭangin Ṭawipui South VC leh YMA hnenah Rs 20,000 an hlan bawk.

Lunglei DDMA chairperson Navneet Man, bawrhsap chuan July 14 tlai khan hriattirna a chhuah a; kawngpui hnawhtu lung liante chu Geology & Mining department leh Lunglei DDMA Quick Response Team ten July 15-ah an hâl darh dawn thu a tarlang.

Ṭawipui South-a leiminin NH-54/2 kawngpui a hnawh pin hi lirthei kal theiha tihtlang a nih hun tur sawi lâwk theih a nih loh avangin, fimkhur tur leh ṭul loa hun leh thâ sen ral a nih loh nan Ṭawipui South paltlang tura zin chhuak rih lo turin Lunglei DDMA hotute chuan mipui an ngen a ni.