Stand Up Lawngtlai hmalakna thlir let

Nimin khan Lawngtlai DC conference hall-ah 'Stand Up Lawngtlai' (Tho Law Dir Tuah) thlirletna hun hman a ni a; bawrhsap Donny Lalruatsanga'n kaihruaiin, Lawngtlai West bialtu MLA C Ngunlianchunga leh LADC chief executive member C Lalsawmzuala te pawh an tel.

Ṭhutkhawmah hian faina leh thianghlimna, lirthei hûnna leh lirthei che vel enkawl (traffic management)-ah tun aia nasa zawka hmalak an rêl a; Mizoram Cleanliness Competition 2026-ah theihtawp chhuah rêlin, hemi atan hian veng tinte'n a tam thei ang ber faina hnatlang nei ṭhin se an ti. CYLA Playground panna kawngah mimal lirthei (LMV) chin tlan phal ni se an ti bawk.

MLA C Ngunlianchunga chuan, Tho Lo Dir Tuah ṭha taka kalpui turin thawhhona ṭha neih a ṭul thu sawiin, "Mi dang tana harsatna siam lo a, huapzo hmasawnna ni tura kalpui zel a ṭul," a ti a; District Administration leh LADC inkara thawhhona ṭha tak awm chu vawn nun zel a pawimawh thu sawiin, ram leh mipuite tan ṭha taka thawkho zel turin a chah.

LADC CEM C Lalsawmzuala chuan, faina leh thianghlimna, lirthei enkawl leh ruihhlo donaah neitu thinlung púa ṭan la thar turin mipui a chah a; "Tho Lo Dir Tuah kaltlangin veng hrang hrangah hmasawnna hmuh tur a awm mek a, hei hi chhunzawm zel a ṭul. Lawngtlai district tan LADC sorkar a ding tlat dawn a ni," a ti.

Bawrhsap Donny Lalruatsanga chuan, Lawngtlai khawpuiin kawng hrang hrangah hma a sawn zel theih nan 'Stand up Lawngtlai' chu April 16, 2026-ah hawn a nih thu a sawi a; Lawngtlai chu khawpui nuam leh chhenfakawm zawka siam tura theihtawp chhuah a nih tur thu sawiin, thawhpuiah mipui a sáwm a ni.

LADC Transport officer HC Vanlalruatpuia sawi danin, lirthei dah dan felfai zawk nan LADC-in thupek a chhuah tawh a, chhun lama parking chu 80 % tihfel tawh niin, zankhuaa kawng kama lirthei dahte aṭangin parking fee a ni tawh. Parking leh No Parking signage târna tura ruatah târ deuh vek a ni tawh bawk.