Lawngtlai district-ah harsatna awm lo

Tun hnaia ruahsur avangin Mizoram chhim lamah leiminin kawngpui a hnawh pin a awm nual a; hetihlai hian, buhfai, tuialhthei leh eirawngbawlna gas-ah harsatna liam a la awm lo.

Thu dawn danin, fûr ruahsur avangin tun hnaiah hun eng emaw chen Bualte daiah leiminin kawng a hnawh ping a, lirthei kal tlang theih a ni lo. July 13 aṭangin Ṭawipui South-ah nasa taka leiminin NH kawngpui a hnawh ping a; Lawngtlai district-ah hmun ṭhenkhatah leimin a awm nual bawk.

Lunglei leh Lawngtlai district-ah leiminin kawngpui hnawh ping nual mah se, mipui ni tin mamawh - buhfai, tuialhthei leh eirawngbawlna gas-ah Lawngtlai district-ah harsatna thleng a la awm lo tih Lawngtlai District Civil Supply Officer chuan a sawi niin The Lawngtlai Post chuan a tarlang.

Lawngtlai DCSO Lianchhuma Chinzah chuan, buhfai chu fûr chhung daih tur hmun kilkhawr zawkah chhêk khâwl a ni tawh a, "Lawngtlaia FCI kudamah buhfai chhek khawl sa a tam tâwk a, harsatna sawi tur a awm lo," a ti. Tuialhtheiah pawh chhek khawl sa a awm nual avangin harsatna a awm lo a, mipui tan chîâina tur a awm loh thu a sawi bawk.