Dawrpui Vengthar M/S Sport School atana siam theih dan tur a hmunah en

School Education minister Dr Vanlalthlana leh Sport & Youth Services minister Lalnghinglova Hmar te chuan July 14, Thawhlehni khan Sport School atana Dawrpui Vengthar Middle School siam theih dan tur a hmunah an en.

Dr Vanlalthlana chuan, khawtlang hruaitute'n zirna lam an ngaihsak a, an inrawlh tam chuan sikul leh zirna a ṭha ṭhin tih a sawi a, "Zirna tihhmasawn nan zirtirtu insiamrem leh sem rual mek zel a ni a, sorkar zirna-in tihchangtlun hi mi harsa zawkte ṭanpuina a nih tel avangin zirna-in tihhmasawn kawngah zirtirtute leh khawtlang hruaitu kan ṭanrual a ngai," a ti.

Sport & Youth Services Minister pawhin thu sawiin, "Kum kal ta khan Dawrpui Vengthar LC leh YMA hruaitute nen sikul tihhmasawn dan tur kan sawiho tawh a, Dawrpui Vengthar M/S hi zirlai an neih tlem avangin a building area hi sport nena kai kawpin Sport School atan siam ni se, tiin ngaihtuahna kan lo hmang tawh a ni," a ti a; Sport School chu National Education Policy 2020 thil tum nena kal kawp a nih thu a sawi.

Minister pahnih ho hian sub-divisional education officer Carolyn Rinthanpuii, Dawrpui Vengthar M/S zirtirtute leh Dawrpui Vengthar LC leh YMA hruaitute chuan Sport School kalpui theih dan tur an sawiho a ni.

Tarlan danin, Dawrpui Vengthar M/S-ah hian academic session kal mekah pawl 5-ah zirlai pathum, pawl 6 leh pawl 7-ah zirlai pasarih ve ve leh, pawl 8-ah zirlai paruk an awm a, an vaiin zirlai 23 an awm a ni.