Kawnpuiah VC Exposure Visit buatsaih

Local Administration department (LAD) leh District Panchayat Resource Centre (DPRC) ṭang dun chuan Rashtriya Gram Swaraj Abhiyan (RGSA) hnuaiah nimin khan Kolasib district-a Kawnpui VC-III ah Exposure Visit Within State Programme an buatsaih ṭan a, vawiinah chhunzawm a ni ang.

Nimina Exposure Visit Within State Programme ṭanna hi Kawnpui VC-III president H Lalfakzuala'n hawngin, inlawmna thu a sawi a; tualchhung rorelna ṭha kalpui dan te, khawtlang hmasawnnaah mipui tel ve a pawimawhzia leh, RGSA hnuaia khawtlang hmasawnna hmanraw pawimawhte chungchangah inhrilhfiah a ni.

Exposure Visit Programme-ah hian Kawnpui VC-III ten Panchayat Advancement Index (PAI) 2.0 score ṭha tak an hmuhna, Local Sustainable Development Goals (LSDG) Theme-2 (Healthy Village) leh Theme-9 (Women Friendly Village) chungchanga hma an lak dante chu zirho a ni dawn a; khawtlang inrelbawlna atana anmahni puala sum an tuak chhuah dan ṭha tak an neihte chu a hmuna tlawha zirho tur a ni bawk.

A ni khatna, nimin khan LSDG Theme-9: 'Women Friendly Village' chungchang Kolasib DPRC head faculty LR Lalrinmawia Hnamte-in a sawifiah a; chawhnuah Kawnpui VC-III ten sum tuak nan leh khawtlang mamawh phuhrukna atana mipui dawr (shop) 12 an siam te, clinic centre leh bazar hmunte tlawh a ni.

Exposure Visit Programme-ah hian hian Kolasib district tih loh district dang zawng aṭangin mi 40 an tel a ni.