All India Service-a lut kan tam tawk lo, ṭan a ngai - Sawivunga

MSU chuan nimin khan Woodland Hills, Zonuamah under graduate Mizo topper mi-24 te lawmpuina hun an buatsaih a, an hun hmanpuitu minister C Lalsawivunga chuan, Mizo zingah all India service-a lut an tam tawk loh avangin ṭan a ngaih thu a sawi.

C Lalsawivunga chuan zirlai an lawmpuite chu taimakna, tumruhna leh tih tak takna an neih avanga hlawhtling an nih thu hrilhin, an hma hunah chhawr tlak ni turin a fuih a, "Mizo ṭhalaite all India sevice-ah lut kan tam tawk lo hi ṭan lak a ngai. UPSC hi kan theihtawpa kan beih bakah hian SSC hi ngaihven thar ila, Mizo ṭhalai tam zawk luh a ṭul," a ti.

Mahni hmasialna, duhamna, hlemhletna leh eiruknain Mizo nun a tih chhiat thu sawiin C Lalsawivunga chuan, "Kan Chief Minister kaihhruaina hnuiah, he sorkarah, a fawng vuantute hi eirukna lakah hian kan la fihlim niin ka hria, ka lawm hle a ni," a ti a, ram siamṭha turin mi tin an pawimawh thu a sawi bawk.

Zirlai lawmpuite hi subject toppers Mizo 24 leh SU leader pahnih niin, pawisa fai leh citation hlan an ni.