Israel Embassy-a mithiamte rawn zin

PHE minister Prof. Lalnilawma'n Mizoram tlawh tura a sawm angin Israel Embassy-a International Development Co-operation (MASHAV) senior water resources specialist Neeraj Gahlawat leh partnership and operations head Arpit KP-te chuan July 15, Nilaini khan Mizoram an rawn thleng a, PHE Minister nen an inkawm nghal.

Prof. Lalnilawma hian New Delhi-a a zin ṭumin Israel Embassy lam hotute a kawm a, inkawmnaah hian Mizoram rawn tlawh a, Mizoram tana thawhhona kawng hrang hrang zawngho turin a sawm a ni. Minister sawmna ngaipawimawhin Israel Embassy aṭanga mithiamte hian Mizoram an lo tlawh a ni.

PHE Minister chuan Israel Embassy hotute chu thawhhona ṭha tak leh hlawhtling tak an neih ngei theih nan Mizoram sorkar lam chu a inhawng reng tih a hrilh a, harsatna hrang hrangte leh hmalak zel dan turte an sawiho nghal a ni.

Israel Embassy aṭanga lo zinte hi PHE engineer-ten an lo dawngsawng a, Aizawl Water Supply Scheme en turin Tlawng lui lamah hruai an ni. A hmunah hian tui supply hnathawh kalphung leh harsatna hrang hrangte an enpui a, fur laia tui lian nasa leh tui chim chin sang lutuk te, tui nu (turbidity) sang lutuk te, ṭhál laia tui kâm nasa leh silt deposit (siltation) chungchangte sawiho a ni.