KHAWTHLIR

Exposure Visit zo

Local Administration department (LAD) leh Kolasib District Panchayat Resource Centre (DPRC) ṭangkawpin Rashtriya Gram Swaraj Abhiyan (RGSA) hnuaia Kawnpui Village Council III-a 'Exposure Visit Within State Programme' an buatsaih chu nimin khan zawh a ni a; Mizoram hmun hrang hranga village council 40 aiawhte an tel. Exposure Visit-a tel VC aiwhte hian Kawnpui VC III-te khawtlang inrelbawl dan leh hmalaknate an zirho a ni.

Aadhaar Camp

Khawzawl DC office, District Education office leh Women & Child Development department ṭangkawp chuan Aadhaar Camp an buatsaih a; camp hi Khawzawl khawchhung veng ṭhenkhatah nimin khan kalpui ṭan niin, district pumah neih tura ruahman a ni. Camp neih chhung hian Aadhaar address-a Champhai district tih la chuang zawngte chu Khawzawl district tia thlak tur a ni a, district thlak bakah siamṭhat (update) ngai hrang hrang leh new enrolment-te a tih theih.

Mawhphurhna hlan

Nimin khan Mizoram Pradesh Youth Congress Committee (MPYCC) president atana ruat thar Ngurdingpuia Pachuau, Zotlang Veng hnenah president kal chhuak Lal Tawnliana, Zarkawt chuan president mawhphurhna a hlan. MPYCC atana ruat thar dangte chu vice president Lalsanglura Sailo, Chhinga Veng; HP Lalchuailova, Chanmari Veng leh R Lalhmingmawia, Ainawn Veng bakah treasurer-ah Lalnunzira, Chhinga Veng te an ni.

Project Thaichhawninu

Women & Child Development (WCD) department leh Lunglei Post Office ṭangkawp chuan nimin khan Lungleia WCD conference hall-ah hmeichhe naupangte an puitlin hun atana nu leh pate'n sum an khawlsakna tura hmalakna, 'Project Thaichhawninu' hawnna an buatsaih. Project hian a tum ber chu kum 10 hnuai lam fanu nei chhungkua a tam thei ang berin Sukanya Samriddhi Account (SSA) an hawn a, an fanute tana sum an khawlsak theih nana hmalak a ni a, Mizoram pumah account thar 4,050 hawn tuma hmalak a ni.