Power Minister hoin Aizawla ṭha zawka power supply pek dan tur sawiho a ni

Power & Electricity minister F Rodingliana hoin July 15, Nilaini khan a pisaah Aizawl Power Circle hnuaia Sub-Division pakuaa thawk JE chin chunglamten Aizawl khawpuia power supply ṭha zawka pek dan tur an sawiho. Minister chuan, thawktu indaih loh avanga field staff-te hah zia a hriatpui thu a sawi rualin, mipui tan ṭhahnemngai taka thawk zel turin a chah.

F Rodingliana chuan, Aizawl Power Circle bakah circle hrang hrangte pawh ṭhutkhawmpui a tum thu a sawi a, "Thawktu indaih loh avanga field staff-te hah zia ka hriatpui che u a, ni khat-a duty tur hlawm li (shift 4)-a ṭhen ṭhin pawh a theih loh avangin duty-te an rimtawng hle rualin, mipui rawngbawlna pawimawh tak a nih zia hriain ṭhahnemngai takin thawk zel ang che u," a ti.

Ṭhutkhawmah hian division hrang hranga thawktute chuan an harsatna hrang hrang leh a sutkian dan tur bakah, an huamchhung ṭheuha power supply khaihlak loa pek theihna tura rawtna hrang hrang an neihte an sawi a; inrawnkhawmna hi thla ruk danah neih ṭhin an rel.

Aizawl Power Circle chhunga thawktute thu thlen aṭangin hmalak zui dan tur ruahmannate PE secretary K Lalrinzuali, E-in-C Ngursailova Sailo bakah Chief Engineer-te leh Superintending Engineer-ten an siam nghal a ni.

Ṭhutkhawma an relte :

☑ 11 kV line thui lutuk, line chhiata thim zau lutuk tih tlem nan leh a ṭhat lohna laite hmuh chhuah zung zung nan a theihnaah ṭhen darhin, a ṭhendarh theih loh line thuite a kar lakah load break switch dah. 11 kV line Vacuum Circuit Breaker (VCB) a rem chang laia vuah.

☑ Aizawl khawpui chawmtu sub-station te phurrit lutuk tih zangkhai nan sorkar aṭanga phalna hmuh tawh Lammuala sub-station thar din chu a rang lama tih hlawhtlin dan dap.

☑ Thawktu duty tur mamamawh tih tlem nan sub-station te computerised dan ngaihtuah bakah distribution transformer tin a power lut leh chhuak chhinchhiah nan in-coming leh out-going meter vuah vek tura hmalak.

☑ Distribution transformer-a fel lo rang taka hriatchhuah theihna tur khawl vuah tura hmalak nghal.

☑ Electric hrui hlui thlak ngaite enfel a, a rang lama report siam turin sub-division tin te hriattir an ni.

☑ Shutdown lak thin tihtlem nan a hrang hranga shutdown la loin repair and maintenance avanga shut down lak ngaite a hmalam kar hniha in-report ṭheuha a ruala shutdown lak a nih dan tur ruahmanna siam a ni.