Bawrhsapin khuarel chhiatna vanga thil man tisang lo turin a chah

Lawngtlai district bawrhsap Donny Lalruatsanga kaihhruaiin nimin khan khuarel chhiatna avanga inkalpawhna kawng ping ṭhinin mipui ni tin mamawh thilah harsatna a thlen loh nana hmalakna kalmek leh hmachhawpte sawiho a ni.Bawrhsap chuan, dawrkai leh sumdawngte chu khuarel chhiatna avanga an bungruate a man tisang lo tur leh manto zawka hralh tuma chheprelh lo turin a chah.

Donny Lalruatsanga chuan, dawrkai leh sumdawngte chu khuarel chhiatna avanga an bungruate a man pangngai piahlama tisang lo tur leh manto zawka hralh tuma chheprelh lo turin a chah a, "Hetiang tih chingte chu dan hmanga hrem theih an ni a, thuiawih lote chungah dan anga hmalak a ni ang," a ti.

Ni tin mamawha harsatna thleng thei ven kawngah LADC, village council leh Young Lai Asso-ciation hmalak ṭhinnate fakin Bawrhsap chuan, district administration-in chak zawka hma a lak tur thu a tarlang bawk.

Ṭhutkhawmah hian sumdawnna hmunpui Lawngtlai Bazar Veng hruaitute chuan an hmalak ṭhin dan sawiin, kawng ping vanga bungrua lut a awm hleihtheih loh lai chuan mipuiten harsatna an tawh loh nan LADC hnuaia Revenue department-te nen inrawntlanga hmalak ṭhin a nih thu an sawi a; a bikin rampawn lama eichawp thil thawn chhuah an remtih loh thu an sawi.

Khuarel chhiatna vanga harsatna thleng denchhena bungrua chheprelh leh manto zawka hralh an awm leh awm lohte LADC, VC leh YLA hruaituten a ṭul angin lo enfiah ṭhin se, an ti a; hemi atana committee emaw squad emaw din ṭha tih niin, a ṭul angin DC office lamin lo bawhzui se, an ti bawk.