College zirtirtu siksawi dan Lunglei MZP-in ṭha an ti lo

MZP Hqrs, Lunglei chuan thuchhuah siamin, July 15, 2026-a Higher & Technical Education department-in college zirtirtu transfer order a tih chhuaha Lunglei district-a college zirtirtute siksawi an nih dan chu ṭha lo an tih thu an tarlang.

Lunglei MZP chuan, "College zirtirtu siksawi dan hi lungawi thlak loh kan ti hle. Zirtirtu indaih lohna nasa tak awm kara hetianga zirtirtute siksawi an ni hi zirlaite hmakhua ngaih pawimawh lohnaah kan ngai. Tun ṭuma college zirtirtu siksawiah hian Lunglei Govt College leh Govt J Buana College aṭangin zirtirtu pathum ve ve lak chhuah niin, zirtirtu pakhat ve ve chauh dah luh an ni," an ti.

Sorkar hnathawk an nih angin sorkarin zirtirtute an siksawi thei tih an pawm tih tarlangin Lunglei MZP chuan, "Amaherawh chu, an aiawh dah loa zirtirtute siksawi an ni ṭhin hi kan hrethiam loin, zirna-in ngaih pawimawh tawk lohnaah kan ngai," an ti a, zirtirtu an sawn chhuah tâkte chu a rang thei ang bera an aiawh dah turin thuneitute an phût a ni.

Lunglei MZP chuan zirlai awm dan mil loa zirtirtu siksawi ṭhin ṭha an ti lo tih tarlangin, "School/college hrang hrang a zirlai awm zat chu Mizoram district kan awmna a zirin a danglam nasa hle. Zirlai tlemnaah leh tam naah pawh class/dept awm dan a in an reng avang leh zirtirtu mamawh dan a in an reng avangin hetianga ruahmanna siam ṭhin hian district te zawk a zirlaite’n an tuar phah mek," a ti.

Lunglei Govt College leh Govt J Buana College zirtirtute sawn chhuaha an aiawh dah lohte a rang lama an aiawh dah turin thuneitute phutin Lunglei MZP chuan, an aiawh dah leh dah loh chungchang an enzui zel dawn tih an tarlang.