Langtlang leh chak zawka kal a pawimawh - IPR Minister

Information & Public Relations, Printing & Stationery (IPRPS) minister B Lalchhanzova hoin nimin khan Angel’s Garden, Zonuamah IPR department hnathawh hrang hrang thlirhona leh chak zawka hmalak zel dan tur sawihona, 'DIPR Conclave 2026' neih a ni a; Minister chuan, mipui rawngbawlna kawnga Department hrang hrangte hna thawh chu langtlang leh chak zawka kalpui a pawimawh thu a sawi.

B Lalchhanzova chuan, department hmasawn nana pawimawh hrang hrangte inpawhtlang taka sawihona buatsaih a ni chu lawmawm a tih thu a sawi a, "Mipui rawngbawlna kawnga department hrang hrangte hnathawh chu langtlang leh chak zawka kalpui a pawimawh hle a, DIPR hotute chu mipuite beng pawimawh tak kan nih avangin kan inchher hriam zel a ṭul," a ti a; mahni leh mahni inel a, mahni zawn ṭheuha hmasawn tum zel turin a chah.

DIPR chu mipui leh sorkar department zawng zawng ta nih thu sawiin Minister chuan, conclave chu hlawkthlak taka hmang ṭheuh turin IPR officer-te duhsakna a hlan a ni.

IPRPS secretary Betsy Zothanpari Sailo pawhin IPR Minister ṭhahnemngaihna bawhzuia department hmalak zel dan tur sawihona chuan rah ṭha a chhuah ngei a beisei thu a sawi a; conclave hi IPR joint director Mina Zoliani Joute-in a kaihruai a, IPRPS Secretariat leh Directorate of Information & Public Relations-a hotute an tel.