Mizo hmeichhiate'n hma an sawn zel hi a lawmawm - Lalrinpuii

Mizo Hmeichhe Ṭangrual (MHṬ) chuan nimin khan Khatla North Presbyterian Kohhran Hall-ah an pawl kum 80 tlin lawmna an buatsaih a; minister Lalrinpuii'n a hmanpuii a, Mizo hmeichhiate'n hma an sawn zel lawmawm a tih thu a sawi.

Lalrinpuii chuan, Mizo hmeichhiaten hma an sawn zel chu lawmawm a tih thu sawiin "A chak apiang leh a fing apiang hi an dingchhuak lo a, an hun tawna danglamna thleng mil zela inher rem thiam apiang an dingchhuak ṭhin. Ruihhlo, HIV/AIDS, cancer leh nupa inṭhenna hluarte chu Mizo society-in a hmachhawn mek an nih avangin heng laka kan ram vawnghim tur hian hmeichhiaten mawhphurhna sang tak kan nei," a ti.

MHṬ hi July 16, 1946 khan din niin, an pawl thupui chu 'Mizo hmeichhia leh naupangte chawisan' tih a ni a; kum 1968 khan Motherless Babies' Home an din a, naupang 418 an enkawl tawh. Aizawl khawpuia hnathawk leh lehkha zir, hmeichhe chanhai zawkte tan kum 1980 khan Working Women's Hostel an hawng a, mi 1,700 velin an chhawr tawh a ni.

Hmeichhiaten mahni intodelh nan leh eizawnna an neih theih nan kum 2016 aṭang khan puanṭhui zirna an hawn bakah, Maternity and Child Welfare Clinic (1956-1973) leh Loin Loom Centre (1962-1967)-te an lo kalpui tawh bawk.