All India Media Conference-ah MJA-te tel

Election Commission of India (ECI) chuan nimin khan Delhi-ah All India Media Conference an buatsaih a, India ram state leh union territory tin aṭangin media-a thawkte telin, Mizoram aṭangin Mizoram Journalist Association (MJA) member pasarih an tel.

Media inkhawmpui hi India International Institute of Democracy and Election Management auditorium, Dwarka, Delhi-ah buatsaih a ni a, thupui chu 'Connect-ing Stakeholders, Streng-thening Democracy: The Role of Media in Elections' tih a ni.

Thupui sawitu ECI director general (Media) Asish Goyal chuan, India rama inthlanna reng reng ECI chuan langtlang thei ang bera kalpui a duh tih a sawi a, "Media mi, ECI authority letter neite chu inthlannaah polling station leh counting hall-ahte an luh phal a ni. Voter-in vote a thlakna lai tak hmuh leh thlalak phal a ni lo a, a dang zawng chu phal vek a ni," a ti.

Conference-a telte hi group hrang hrangah inṭhenin, sorkar thuneituten electoral roll an buatsaih dan entirna (demonstration) te, vote thlak dan chhawng hrang hrang te, vote chhiar dante a taka enin, sawihona hun a hmang nghal a; Vanglaini palai zawhna chhangin ECI hotute chuan, MLA leh MP thlana vote chhiarna counting hall-ah ECI authority letter nei chanchinbumite an luh theih thu an sawi.

All India Media Conference-ah Mizoram aṭanga chanchinbumi kalte hi - Times of India correspondent HC Vanlalruata, Vanglaini joint editor K Zothanpara, LPS news editor Lalramdinsanga, India Today NE correspondent B Lalmalsawma, AIR news editor Isaac Zoramsanga, DD News Mizoram reporter Caroline Lalro-sangi leh Zonet Cable TV programme executive Zorinpuii Hlawndo-te an ni.

Official aṭangin joint chief electoral officer Ethel Rothangliani leh media in-charge officer Lalnunmawii, IPR deputy director-ten an ho a ni.