Samthang khuain nuai 30 man zikhlum hralh tawh; TNT leh OKM hnenah zikhlum kg 2,500 an pe

Samthang khuaa zikhlûm chingtu Samthang Farmer Association chuan nimin khan Thutak Nunpuitu Team (TNT), Zuangtui leh Operation Kingdom Ministry (OKM), Phunchawng hnenah an zikhlûm thar kg 2,500 (bag 44) an pe. Samthang khua hian kuminah zikhlum hmangin cheng nuai 30 vel an lalut tawh.

TNT leh OKM hnenah hian Samthang Farmer Association president Lalramsiama hoin an pawl hruaituten zikhlum hi nimin khan an hlan a, Samthang Welfare Committee, Aizawl hruaituten an ṭawiawm a ni.

Thudawn danin, Champhai district-a Samthang khuaah hian kum 2005 aṭang khan fûr zikhlûm an ching ṭan a, chhungkaw 101-in eizawnna atan an hmang mek. Kumin bikah May thla tir aṭang khan zikhlûm hi an thar ṭan a, kar tin Thawhṭanni leh Ninganiah Mizoram hmun hrang hrangah an hralh chhuak ṭhin.

Kumin hian zikhlum quintal 1,200 vel an hralh tawh a, zikhmul an hralhna aṭang hian Rs 30,00,000 vel an lalut tawh. Tunah hian quintal 1,000 vel hralh tur an la neih an in beisei.

Horticulture minister C Lalsawivunga chuan nimin khan Samthang Farmer Association hnuaia zikhlûm chingtute ṭanpuina atan Rs 15,000 a pe a; kar hmasa khan bialtu MLA Ramthanmawia'n Rs 50,000 a pe bawk.

Samthang Farmer Association hruaitute chuan Minister leh MLA chungah hian an lawm thu an sawi.