Rel chawlhhmun enkawl tur din

Mizoram sorkar chuan tunhnai khan Mizoram chhunga Sairang Rel Station enkawltu tur coordination committee a din a, an hmalakna turte pawh a ruahman fel nghal.

GAD tarlan danin, Sairang Rel Station hi September 13, 2025-a hawn a nih tak hnuah lut leh chhuak an ṭhathnem tak em avangin department hrang hrangte ṭangkawpa chinfel ngai harsatna administrative leh dan kaihhnawih engemaw zat a lo chhuak a ni. Chuvangin, Mizoram chhunga railway station hrang hrangte chu tluang taka leh tha taka enkawl a nih theih nan, coordination committee hi din a ni.

Coordination committee-ah hian adviser to CM TBC Lalvenchhunga, MLA chu chairman a ni a, Transport director chu member secretary a ni. Member atan Divisional Railway Manager, Lumding leh Chief Engineer, Northeast Frontier Railways bakah department hrang hrang 13 aṭangin member ruat an ni.

An hmalakna turte :

☑ Sairang Railway Station enkawl tura din coordination committee hi department hrang hrangte ṭangkawpna tur a ni.

☑ Station tluang tak, him tak leh ṭha taka a kal theih nan mawhphurhna a nei ang.

☑ He committee hian department pawimawh zawng zawngte inbiakpawhna leh thawhhona hmun khata a siam ang. Station-a harsatna administrative, dan leh kaihhruaina, leh hna kal zelna lamah a lo awmte a chinfel ang.

☑ Committee hian ṭangrualin inspection a nei ṭhin ang. Harsatna thar lo chhuakte a enfiah ang.

☑ Railway station enkawl dan tih ṭhat theih nan hmalakna ṭulte a rawt ang.

☑ Committee hi thla 3 danah vawi khat tal a thu ṭhin ang.

☑ A thurel leh a rawtnate chu state sorkar hnenah an thehlut ṭhin ang