Ṭhangtharte hi kan ramin min ko mek - HTE Minister

Higher & Technical Education minister Dr Vanlalthlana chuan, ṭhalaite chu an lungawina (comfort zone) aṭanga tal chhuak a, khawvel zau zawkah an chhuah ngam a ṭul tih sawiin, "Ṭhang-tharte hi kan ramin min ko mek," a ti.

Dr Vanlalthlana hian nimin khan Pachhunga University College-in an college aṭanga zirlai pass tharte lawmpuina ‘felicitation programme' an buatsaih hmanpuiin, thu a sawi a, "Khuangchera khan lehkha zir sang lo mah se, a ramin a koh angin a ram tan a nun a hlan," a ti a, ṭhangtharte chu Mizoramin a koh mek thu a sawi.

Resources ṭha tak tak an nei tih sawiin HTE Minister chuan, "Heng hi system ṭha zawk nen kan enkawl a, kan thiamna hmanga kan tihpun a, kan ram tan kan thiamna kan hlan a pawimawh. Mizoram leh kan hnam nunphung hi a nuam a, kan thlahlel ṭhin. Mahse, kan comfort zone aṭang hian tal chhuakin, khawvel zau zawkah kan talchhuah ve ngam a ngai," a ti.

PUC aṭanga zirlai pass tharte chawi-mawina hi PUC Multipurpose Auditorium-ah neih a ni a; Minister hian college magazine 'Buannel' a tlangzarh nghal a ni. BA pass thar 401, BSc pass thar 209, BCom pass thar 55 leh BBA pass thar 35, an vaiin zirlai pass thar 708 an awm a, chawi-mawina thuchei leh thilpek hlan an ni.

Kumin hian PUC hian UG-ah rank holder 122 neiin, heng zingah hian subject topper 12 an awm a; Laltluangpuii, Physics department chu gold medalist a ni.

PUC-ah hian zirlai 3,114 an awm mek a; state 13 aṭangin national students 63 leh ram hrang hrang aṭangin interna-tional students 12 an awm bawk.