KHAWTHLIR

Thisen pe

ZMCH Laboratory Technical Staff Welfare chuan nimin khan ZMCH Blood Centre tan thisen unit 65 an pe a, petute hmeichhia 39 leh mipa 26 an ni.

Kum 25 tlin lawm

Thenzawl Venghlun Branch YMA chuan nimin khan Thenzawl Auditorium-ah an kum 25 (silver jubilee) tlin an lawm a, an hun hmanpuitu Central YMA general secretary Prof Malsawmliana chuan, "YMA dinchhan 'ṭanpui ngaite ṭanpuitu' i theihnghilh lo ang u. Mizo hmeichhiaten hnamdang pasal neih loh tum ila, mipate pawh neih tlakin nun tum ila. Hriselna i ngaipawimawh ang u," a ti. Thenzawl Venghlun Branch hi July 17, 2001 ah din a ni a, tunah hian member, mipa 369 leh hmeichia 374 an vaiin 743 an awm.

Free Health Camp

Khawzawl district bawrhsap K Vanlalṭhiana hoin nimin khan a pisaah Khawzawl district-a sumdawnna lirthei khalhtute leh sorkar driver-te puala Free Health Camp neih dan tur rel a ni a; Free Health Camp hi July 23, 2026 khian Zaingen Hall-ah neih tura rel niin, a thlawnin test hrang hrang blood group, diabetes (zunthlum), blood pressure, hepatitis, HIV leh syphillis (saihri)-te a tih theih dawn a ni.

MSME Townhall Meeting

Reserve Bank of India (RBI), Aizawl chuan nimin khan Thakthing Multipurpose Hall-ah MSME Townhall Meeting a buatsaih a; MSME entrepreneur-te, bank-a thawktute, sorkar aiawhte leh development institution aiawhte telin, MSME sector-a remchanna leh harsatna awm theite an sawiho.

Bolero pahnih hlan

Lunglei district-a Bana Kaih (Handholding) Scheme hnuaia Mizoram District Transformation Programme (MDTP) kaltlanga hriselna kaihhnawih hmalakna atana Bolero Camper pahnih lei thar chu nimin khan district bawrhsap Navneet Mann chuan Lunglei District Senior Chief Medical Office hnenah a hlan.

Minister-in hmanpui

Minister of state B Lalchhanzova chuan July 16, Ningani khan Aijal Club-ah Rotary Club of Aizawl hruaitu nemnghehna inkhawm vawi 35-na a hmanpui. B Lalchhanzova chuan, social worker a nih angin Rotary Club member-te chu an ngaihtuahna laimuah ṭhalai, zirlai, rualbanlo, kum upa te leh harsatna bik neite awm se a duh thu sawiin, Mizoram tan theihtawp chhuah turin a chah.