Raltlante kaihhruaina thlirho

Lawngtlai district bawrhsap Donny Lalruatsanga kaihhruaiin nimin khan DC con-ference hall-ah dan loa Lawng-tlai district-a raltlan(foreigner) lutte khuahkhirhna 'Standard Operating Procedure (SOP)' leh an sumdawnna endik chungchang sawiho a ni a; LADC chief exe-cutive member C Lalsawmzuala'n a telpui.

C Lalsawmzuala chuan, dan loa Lawngtlai district-a lutte chungchanga sorkar,VC, NGO leh Kohhranten thawhhona ṭha tak an nei ṭhin chu a lawm thu a sawi a, "Kan thawhhona hi kan vawnnun zel a pawimawh hle. Ṭhenawm ramte nena insumdawntawn chu thil ṭha tak a nih rualin, dan loa lo lutte sumdawnna kawngah mumal taka inkaihhruiana siam a nih loh chuan a ram neituten kan tuar thei dawn. Chuvang chuan uluk leh fimkhur taka ngaihtuahna sen thiam a ṭul hle a, hemi kawngah hian LADC leh district administration-ten thawhhona ṭha taka kan thawhho a pawimawh," a ti.

Ramria duty Assam Rifles mawh-phurhna a sang hle tih sawiin C Lalsawm-zuala chuan, mipui himna hriaa an theih chin china lo fimkhur turin a ngen a; Lawngtlai district mipui tana himna leh ralmuanna siam chu LADC sorkar thil tum ber a nih angin dan ang leh mipui duh anga hmalak zel a nih tur thu a sawi.

Donny Lalruatsanga chuan sorkar laipuia Ministry of Home Affairs thuchhuak angin raltlante biometrict enrolment kalpui mek a nih thu leh, zawhfel ṭep a nih thu a sawi a; VC tinte leh hotel neitute chu raltlan dan loa lo lutte dik taka chhinchhiah tur leh tumah lo humhim lo turin a chah bawk.