Pan-India Rescue Rehabilitation rel

Khawzawl District Level Task Force on Child Labour chu district bawrhsap K Vanlalthiana kaihhruaiin nimin khan an ṭhukhawm a; World Day Against Child Labour puala NCPCR huaihawt Pan-India Rescue Rehabilitation 4.0 kalpui dan tur an rel.

Tarlan danin, India danpui-in a sawi angin naupang kum 14 chin hnuai lam chu sikul kal lo emaw, sikul kal theih loh phah emawa hmun hrang hranga chhawr an nih chuan ‘child labour’ a ni a; kum 14 – 18 inkarte pawh nunna atana hlauhawm thei hmuna chhawr khap a ni.

Pan-India Rescue Rehabilitation 4.0 hi June 12 – August 31, 2026 chhunga neih tur a ni a, India ram pum huapa naupang hmun hrang hrang dawr, workshop, factory leh hmun danga chhawrte hmuhchhuah leh chhanchhuah beihpui thlakna tur niin, ṭhutkhawmah hian he hmalakna awm tura mawhphur turte ruat an ni.