NEET-UG-ah Mizoram aṭangin 1,353 tling; Mizoram pakhatna India-ah 11,875-na a ni

Medical course hrang hrang zir tur thlanna, National Eligibility Entrance Test (NEET-UG) 2026 result chu July 16, 2026 khan National Testing Agency (NTA) a tichhuak a; Mizoram aṭangin mi 1,353-in mark hmuh ngai zat an hmu pha a, H Malsawmdawngzuala s/o Lalsangzela Hauzel, Khatla chuan a ti ṭha ber.

Thu dawn danin, H Malsawm-dawngzuala hian full mark 720-ah mark 595 hmuin, a mark percentile chu 99.40602 a ni a, India ram pumah 11,875-na niin, tribal zingah 83-na a ni. Mizoram state entrance exam (SMATEE) 2026-ah pakhatna a lo ni tawh bawk.

Kum 2026 hma lama Mizoram aṭanga NEET(UG) neih tawha mark hmu ṭha ber Cynthia Lalhlupuii Shangpliang (2025) chuan mark 474 (percentile 96.0882934) a hmu a, hei hi H Malsawmdawngzela hian a rawn khûm a ni.

India hmarchhak state bikah, state khata ti ṭha ber zingah Mizorama ti ṭha ber aia ti ṭha Assam (133-na), Tripura (166-na), Manipur (7,105-na) leh Arunachal Pradesh (8,673-na) an awm a; Meghalaya (14,455-na), Sikkim (14,777-na) leh Nagaland (42,124-na) state-a pakhatnate chu Mizorama pakhatna aia ti ṭha lo an ni thung.

Thu dawn danin, kum 2025 khan Mizoram state sorkarin MBBS seat 79 a nei a, ZMCH-ah 70, RIMS Imphal-ah pasarih leh Agartala Medical College-ah pahnih a ni a; BDS-ah seat 12 a nei bawk.

Kumin NEET (UG)-ah hian mi 11,21,185-in mark hmuh phak ngai (cut-off mark) an hmu a, chu'ng zingah chuan tribal 63,716 an tel. Mizoram aṭangin mi 2,624-in examination form thehlutin, mi 2,166 an exam a, mi 1,353-in cut-off mark an hmu a ni. Cut-off mark hmu pha hi India ram pumah 56.06% an nih laiin, Mizoram bikah chuan 62.46% a tling. Cut-off mark hi kuminah tribal-te tan percentile 40 (mark177/720) a ni.

NEET(UG) 2026 hi May 3, 2026-ah exam a ni a, mahse, zawhna pût ru (leak) a awm avangin June 21 khan exam ṭhat leh a ni. Ram pumah Aryan Gupta, Punjab chu pakhatna niin, mark 715 (percentile 99.9999) a hmu a; pahnihna Panshul Bansan, Haryana pawhin mark 715 tho a hmu a, NTA-in ranking criteria a siam danah pahnihna a ni thung.

NEET-a tlingte hian India rama sorkar, pawl/kohhran leh mimal enkawl zirna-inah MBBS, BDS (Bachelor of Dental Surgery), BAMS (Bachelor of Ayurvedic Medicine and Surgery), BUMS (Bachelor of Unani Medicine and Surgery), BHMS (Bachelor of Homeopathic Medicine and Surgery), BSMS (Bachelor of Siddha Medicine and Surgery), BASLP (Bachelor of Audiology and Speech-Language Pathology) leh BVScAH (Bachelor of Veterinary Science and Animal Husbandry) te seat awm dan azirin an zir thei dawn a ni.