KHAWTHLIR

Thisen pe

July 18, Inrinni khan pawl paliin thisen unit 168 an pe. Ramhlun North Branch YMA-in Civil Hospital, Aizawl tan unit 61 pein, petute mipa 42 leh hmeichhia 19 an ni a; KṬP, Durtlang Branch-in Synod Hospital tan unit 39 pein, petute mipa 32 leh hmeichhia pasarih an ni. Salvation Army Youth, Central South Division-in ZMCH tan unit 39 pein, petute mipa 31 leh hmeichhia pariat an ni a; Pentecostal Youth Department (NEI) Lunglei Hqrs Bialin Lunglei Civil Hospital tan unit 29 an pe a, petute mipa 26 leh hmeichhia pathum an ni.

Opium man

END, MTP Kumpuan Committee, Siaha leh YLA Niawhtlang Branch hruaitute chuan July 17, 2026 khan Niawhtlang khuaah Lesa (40) s/o Lekung, Zesaw khua, Chin state, Myanmar leh Chungnuamthanga (41) s/o Chhumluaia, Niawhtlang a cheng nia inchhalte hnen aṭangin opium kg 6.870 an man.

Din champha lawm

Ailawng Branch YMA chuan July 18, Inrinni khan an din champha vawi 80 Khuangchera Hall-ah an lawm a, bialtu MLA Dr R Lalthangliana'n a hmanpui. MLA chuan, YMA anga kohhran leh political party thliar ve lo, hlawh leh lawmman phût loa chanhai leh riangvai ṭanpui ngaite ṭanpui ṭhin pawl thianghlim leh zahawm khawvel hmun dangah an awm loh thu a sawi.

Director-in hmanpui

July 18, Inrinni khan Hnahthial District Agriculture Office conference hall-ah National Mission on Edible Oil (Oilseeds) chungchang leh crop insurance chungchanga kut hnathawktute hriat tur inzirtirna buatsaih a ni a, Hnahthial district-a khaw hrang hrang aṭangin kut hnathawktu ṭhahnem tak an tel. Zirhona hi Agriculture & Farmers Welfare director Vanramthangi'n a hmanpui a ni.

Lehkhabu chhiar campaign buatsaih

MYC hnuaia Promotion of Reading Culture leh Venghlui Branch YMA Library & Archive Sub-Committee chuan July 18, Inrinni khan Venghluia Central Hall-ah YMA chhangte pualin 'Lehkhabu chhiar campaign' an buatsaih a, MYC chairman Malsawmzuala Ralte-in a hmanpui.