Imaginarium 2.0-ah Tourism Minister a tel

Tourism minister Lalnghinglova Hmar chu July 18, Inrinni zan khan Mayfair Spring Valley Resort, Guwahati-a buatsaih Imaginarium 2.0 - North East Events & Entertainment Leaders’ Summit-ah a tel. Inrinni vek khan Assam Tourism minister Ajanta Neog nen an inkâwm.

Imaginarium 2.0 hawnna inkhawmah Lalnghinglova Hmar chuan, Mizoramin tourism-ah theihna sang tak a neih thu an sawi ṭhin chu a taka chantir a hun tawh tih sawiin, "Mizoram tlang leh ruam mawi tak tak, lui leh boruak thiang takah in event neihte rawn nghat u la, lawm takin kan lo thleng ang che u,” a ti.

Mizoram chu hmun kilkhawr a ni tawh lo tih sawiin Lalnghinglova chuan, "Mizoramah rêl a luh tawh avangin awlsam leh tlawm zawka tlawh zung zung theih a ni tawh a, thlawhna phei chuan India ram hmun hrang hrang aṭangin darkar rei lo teah thlen theih a ni," a ti a; tourism event-te chu eizawnna tam tak siam thei a nih avangin Mizoramin nasa zawkin ṭan a lak dawn thu a sawi.

Imaginarium 2.0-ah hian Mizoramin tourism event leh kût lian thleng tura theihna a neih dan te, sorkarin event tourism hmasawnna tura hma a lak dan te, Mizoram Tourism Calendar te entira sawifiah a ni a; video hi Tourism department leh IPR department te siam a ni.

Assam Tourism minister Ajanta Neog nen a ina an inkawmnaah Lalnghinglova Hmar chuan, Mizoram tlawhtu khualzin tam zawk chu Assam aṭanga kal an nih thu sawiin, "Hei hian tourism kaihhnawihah state pahnihte inkara thawhhona ṭha zawk neih a ṭulzia a tilang a, thawhhona nghet zawk kan neih chhoh ka beisei," a ti.

Ajanta Neog chuan, Mizoram nena thawhona ṭha neih chu Assam duhthusam a nih thu leh, state pahnih tana thil lawmawm a nih thu a sawi a; Mizoram Tourism Minister-in a sâwm angin Mizoram tlawh a, kût hrang hrangte kumin chhung ngeia rawn chhim a tum thu a sawi bawk.