Tunlai ṭhalai tam takin thawh hreh an nei tawh lo - MLA Jeje Lalpekhlua

Hnahthiala School of Agricultural Sciences (SAS) Auditorium-ah July 17, 2026 khan SAS 4th Batch Passing Out Programme buatsaih a ni a, bialtu MLA Jeje Lalpekhlua'n a hmanpui. MLA chuan, tunlai ṭhalai tam takin thawh hreh an neih tawh loh thu a sawi.

Jeje Lalpekhlua chuan, zirlai pass tharte a lawmpui thu a sawi a; SAS tichangtlung turin theihtawp chhuaha hma an lak thu sawiin, "He hmun aṭanga zir chhuakte hian rahbi hmasa ber in chuang kai chiah a, harsatna in la hmachhawn dawn. In hlawhtling mai lo a nih pawhin beidawng mai loin taima taka bei zel ang che u. Tunlai ṭhalai tam takte chu eng hna pawh thawh hreh an nei lo hi an fakawm tak zet a, kut hnathawh lama kal, theihtawp chhuahte chu sorkar pawhin theihtawpa puih a hreh lo," a ti.

Zirlaite chu eng kawng pawh zawh se, tih tak takna nen bei zel tura chahin MLA chuan, "Hlawhtlin hma loh chu mahni seh tawh chu seh tlat tur a ni," a ti a; an thiam chinah duhtawk mai loa hmasawnna kawng zawh zel tur te, thiamna chhar belh zel tura mi dang thiam zawkte ráwn hreh lo turin a chah.

Inkhawm hi SAS principal VL Hmangaih-chhunga'n a kaihruai a, khualzahawm Vanramthangi, Agriculture & Farmers' Welfare director pawhin thu a sawi.

Kum 2024-2026 chhunga SAS zirlai, batch 4-na zingah 29 an hlawhtling a, anmahni thlahna inkhawmah hian AFW department leh Hnahthial district sorkar hotute bakah, VC, MJA leh pensioner-te an tel.

School of Agricultural Sciences hi Integrated Training Centre (ITC) tih hming puin kum 1981 khan din a ni a; kum 2020 khan diploma course-a hlan kai a nih hnuah SAS tia thlak a ni. Agriculture & Farmers' Welfare department hnuaia training centre awm chhun a ni a, kum tin seat 30 a awm ṭhin.