Oil palm chìn theihnaah chìn khah vek theih nan ṭan lak a ṭul - Agri Minister

Agriculture & Farmers' Welfare minister PC Vanlalruata chuan July 17, 2026 khan Kolasib Parish Hall-ah State Level Mega Oil Palm Plantation Drive 2026 a hmanpui a; Kolasib leh Mamit district-a oil palm chìn theihna hmun zawng zawngah chìn khah vek a nih theih nan ṭan lak a ṭul thu a sawi.

PC Vanlalruata chuan, National Mission on Edible Oils - Oil Palm (NMEO-OP) hnuaiah sorkar laipuiin oil palm hmun nei tura Mizoram a beiseina an la pha lo hle tih a sawi a, "Oil palm chìn theihna hmun zawng zawngah ching vek pawh ni ila Mizoram leilung 3% vel chauh a la ni dawn. India ram hi hriak (edible oil) lamah intodelh a tum avangin central sorkarin duhsak takin mipui hmasawn nan min kaihruai a, Kolasib leh Mamit district-a oil palm chìn theihna hmun zawng zawngah chìn khah vek a nih theih nan ṭan lak a ṭul a ni," a ti.

Lunglei, Lawngtlai leh Siaha district-ah te pawh hmalakna mek a nih thu sawiin Minister chuan, oil palm chingtute'n an tharte an phurh chhuahna kawnga harsatna an tawh ṭhin sutkian nan DoNER hnuaia NESIDS-Road sum hmangin oil palm link road km 32.70-a thui PCC pavement-a siam mek a nih thu leh, NMEO-OP scheme-ah cheng nuai 840.44 senna tur ruahman a nih thu a sawi.

Khualzahawm K Laldawngliana, Tuirial bialtu MLA pawhin thu sawiin, oil palm chu intihhmuh a pawimawh thu a sawi a, "Oil palm chìn hi chu kan fate tana bank account hawn lâwk ang deuh a ni," a ti. Inkhawmah hian Kolasib district-a oil palm chingtu zinga thawk ṭha mi panga hnenah lawmman pek a ni.

Tarlan danin, Mizorama hectare 7,260-a zauah oil palm chin niin, district pariatah chin a ni a; kum khatah oil palm metric ton 7,500-8,000 inkar thar ṭhin a ni.