High Court Judge-in District Jail a tlawh

Gauhati High Court judge Justice Nelson Sailo, Mizoram State Legal Services Authority executive chairman ni bawk chuan July 17, 2026 khan Serchhip District Jail tlawhin a enfiah.

Justice Nelson Sailo chuan, mipuite’n dan leh hrai leh an dikna chanvote an hriat a pawimawh thu a sawi a, "Harsatna tawkte tan anmahni ṭanpui turin Legal Services Authority an awm reng a, dan lam hriatna kawnga harsatna neite chuan an buainate chu Legal Services Authority hnenah thlen nachang an hriat a ṭul," a ti.

Gauhati High Court Judge hian Serchhip District Jail-a tâng mekte dinhmun enfiahin, an harsatnate a ngaihthlaksak a, tángte mamawh tur thilpek a hlan. Serchhipa Circuit Court leh judicial quarters te a tlawh nghal a; nimin khan Thenzawl Bazar Venga Legal Aid Clinic a tlawh bawk.

Tarlan danin, July 17 khan Serchhip District Jail-ah táng mi 93 an awm a, mipa 83 leh hmeichhia 10 an ni. NDPS hnuaia thubuai nei mipa 16 leh hmeichhia panga, rûkrûk kaihhnawiha táng mipa 36 leh hmeichhia pakhat, MLP Act hnuaia thubuai nei mipa 14 leh hmeichhia pali, POCSO Act hnuaia thubuai nei mipa pariat, tualthah tum thubuai (attempt to murder) nei mipa pakhat leh chhan dang avanga táng mi pariat an awm a ni.