MSPMC-in kawng thawm ṭhat an endik

Mizoram State Project Monitoring Committee (MSPMC) Inspecting Team chuan July 17, 2026 khan SASCI Part-V (2025-26) hnuaia Serchhipa national highway kawng hlui thawm ṭhat mek an endik a; hna hi March 27, 2027-a zawh tura ruahman niin, 39% vel an thawk zo tawh.

Resurfacing of Old National Highway Road at Serchhip under SASCI Part-V hi technical sanction amount chu cheng vbc 10 niin, contractor chu Urban Infraprojects Pvt. Ltd., Kolkata a ni a, agreement amount Rs 9,61,55,482.60 a ni. Agreement hi Mizoram PWD Chief Engineer (Roads) leh Urban Infraprojects ten March 17, 2026 khan ziakin, March 27, 2026-ah hna an ṭan a, hna zawh hun tura inremna chu March 27, 2027 a ni.

MSPMC Inspecting Team hian hna thawh mek chu Kikawn aṭanga an enfiah a, hna enkawltu PWD Serchhip Division hotute'n an thawh tawh chin leh hmabak la awmte an hrilhfiah. Hnain a ken tel meter 300 vela thui kawngpui zauh hna chu zawh el a nih tawh thu leh tui luankawr (side drain) siam hna thawh mek a nih thu an sawi.

PWD Serchhip Division hotute tarlan danin, box culvert siam tur leh kawngpui bituminous concrete (BC)-a siam turte chu la hmabak lian a ni a, ruahtui a ziaawm veleh BC-a kawng siam hna ṭan nghal theih an beisei. Hnathawh tur aṭanga 39% vel an zo tawh a, harsatna dang a awm loh chuan hun tiam chhunga hna zawh hman an inbeisei a ni.