Lirtheia chetsualnaah mi 2 an thi

July 19, Pathianni khan Mizoram hmun pahnihah lirthei a chesual a, mi pahnih - Vanlalruata, Saitual leh Zomuansangi, Mualṭhuam North te an thi.

July 19 tlai dar 3 vel khan Keifang aṭanga km 5 vela hlaah bike a chesual a, a khalhtu Vanlalruata (18) s/o Vanlalzawma, Saitual Bethel Veng a thi nghal. Thu dawn danin, Vanlalruata hian bike a khalh lai chu thla lo laksak turin a ṭhianpa a ti a, bike-a a tlan ṭan chu kawngpui sira lungrem a sú a, a hmunah ká chhawn lohin a thi a ni.

July 19 zan tir lam khan Lunglei district-a Haulawng leh Tlawng lei inkar, Mausen khaw daiah car a chesual a, Mualṭhuam North High School-a Hindi zirtirtu Zomuansangi (45) w/o Lalrotluanga Hnamte a thi.

Thu dawn danin, car chesual hi Lunglei aṭanga Mualṭhuam North lam pana tlan a ni a, zan dar 8:45 velah car-a chuang ve an fanu chu kawngpuiah a vak chhuak a, an chesual tih hriat chauh a ni. Zomuansangi te chhungkua hi Lungleia chhiattawhnaa kal an ni a, zan tir lamah Mualṭhuam North an pan a, car hi a pasal Lalrotluanga Hnamte-in a khalh. Lalrotluanga Hnamte leh an fate pahnih erawh chu an hliam na lutuk lo nia thu dawn a ni.