KHAWTHLIR

Bangalore-ah Assembly Speaker

Assembly speaker Lalbiakzama chuan July 19, Pathianni khan Bangalore-ah Bangalore Mizo Association leh Mizo Students Association hruaitute a kâwm a; Bangalore Mizo hruaitute chuan Bangalore-a Mizo zirlai zir zel duhte tan leh, zirzo tawhte an kal zelna tur atana pawimawh nia an ngaihte leh Mizo mipuite tana Bangalore-a zirna leh hna zawnna lama thil pawimawh nia an ngaihte an thlen. Hengte hi a ṭul ang zela bawhzuipui a inhuam thu Speaker chuan a sawi.

BLO app inzirtir

Mamit district-a booth level officer (BLO)-te tan nimin khan Mamit, Reiek, West Phaileng leh Kawrthahah Special Intensive Revision (SIR) 2026 neih meka BLO App hman dan zirhona buatsaih a ni. SIR Draft Electoral Roll-a hming thun, paih leh siamṭhatna hun chhunga BLO-te kaltlanga form lutte chinfel dan tur te, no mapping leh discrepancies chungchang chinfel dan turte a lem nen an inzirtir a ni.

Hearing tih dan tur

Lawngtlai district election officer Donny Lalruatsanga chuan hriattirna chhuahin, SIR 2026 Draft Electoral Roll tihchhuah tawha claim & objection hun hawn mekah, ERO/AERO-te'n hearing neih hun tur an siam zûlzuiin hearing neih tur a nih thu a tarlang. Electoral roll-a chuang tur dik takte chauh an chuàn theih nan hearing tihnaah langtlang leh dik taka official-te puibâwm turin Village Level Standing Committee-te ngen leh hriattir an nih thu a tarlang bawk.

Thuthlung ziak

Mizoram UPC leh United Apostolic Fellowship, Maryland, USA chuan nimin khan Mizoram UPC General Headquarters conference hall-ah India leh Asia khawmualpuia rawngbawlna atan thawhhona thuthlung an ziak. United Apostolic Fellowship aiawhin Missions director Rev. Biakchhawna leh Mizoram UPC aiawhin general superintendent Rev. Ngurthanpara Sailo ten hming an ziak a ni.