World Cup final avangin Mizoram sorkarin chawlh a puang

Mizoram sorkar chuan July 19, Pathianni zanlai pelhah World Cup 2026 final khelh a nih avangin nimin kha zirna-in tan chawlhah a puang a; sorkar department danga thawkte tan ni chanve chawlh (half holiday) a puang bawk.

GAD chuan July 19, Pathianni zan khan office memorandum a tichhuak a; zan reiah World Cup final khelh a nih avangin zirna-in tan chawlh puan a nih thu leh, sorkar pisa tan half holiday puan a nih thu a tarlang. Department leh pisaa hotute chu mipui ni tin mamawh leh rîkrum thilah harsatna a thlen loh nan ruahmanna siam turin a hriattir nghal.

Zirna-ina thawk ni lo, sorkar hnathawk dangte tan nimin chawhma chhung chawlh puan a ni a; sorkar hnathawkte chu chawhnu dar 1 aṭangin pisa an kai ṭan.

Chief minister Lalduhoma chuan chawlh puan a nih chungchang social media-ah a sawifiah a, "Mizote hi football ngaina tak kan ni a, kan ṭhalaite zingah pawh eizawn nana hmang thei khawpa thiam an tam tawh a, hetiang ṭhalai hi neih belh zel pawh kan duh a ni," a ti.

World Cup chu 'The Greatest Show on Planet' tia sawi ṭhin a nih thu tarlangin Lalduhoma chuan, "Khawvel mipuite thlir nasat, kum li dana thleng ṭhin a ni. Final match awm tur hi kan tan zanlai pelh tawh hnua khelh a ni dawn," a ti. State ṭhenkhatte tih dan angin, Mizoram mipuiin hahdam taka inkhel an en ṭheuh theih nan chawlh puan a nih thu tarlangin, "Hlim tak leh ngaihngam takin World Cup 2026 final i en tlang ang u," a ti bawk.

FIFA World Cup vanga nimina zirna-inte tana chawlh puan leh sorkar hnathawkte tana ni chanve chawlh puan hi Mizorama a thlen vawi khatna a nia sawi a ni.