State Games a hlawhtlin loh hlauthâwng

Nimina ZPM party pisaa inkhawmah Andrew H Thangliana, MLA-in thu sawiin, infiamna leh Mizo infiamna (indigenous game)-te khaichhuah tumna vanga State Games buatsaih chu a ṭhat rualin, rilrua lang thut vanga tih mai mai a nih chuan a hlawhtlinna tak tak a awm loh a hlauhthawnawm thu a sawi.

Andrew H Thangliana chuan, "Financial management chungchangah kan sorkar hrawn mekin sport leh indigenous game-te khaichhuah tumna rilru pu chunga Mizoram State Games an buatsaih hi an fakawm hle a, chutih rualin, rilrua lang thuta thutlukna siam zung zung a nih chuan, hlawhtlinna tak tak leh ram ropui min thlen lo ang tih a hlauhawm a ni," a ti.

ZPM candidate-te'n inthlan dawna an sawi tawh, 'Mipuiin awlsam zawka dàwr theih turin hun ka hmang ang' tih chu tihlawhtling tura hma an lak nghal thu sawiin Andrew Thangliana chuan, "Ka bial chhung khaw lian ber Kawnpuiah in ka luah lut nghal a, sorkarin sum a neih loh êm vanga MLA fund min pek theih chhun tlemtê chu mipui tana ṭangkai thei ang ber turin kan hmang mek a ni," a ti a; mipui phurrit chhâwk turin MLA fund aṭangin Kawnpui HSS-a LDC te, naupang thawh khawma rawih Thingdawl M/S zirtirtute chu an kum khat chhung hlawh tur a ruahman mek thu a sawi.

Andrew H Thangliana chuan, Kawnpui College lecturer hlawh pawh grant-in-aid aṭangin an pe mek tih sawiin, "Education Minister-in MLA-te fund education sector-ah 10% ṭheuh tal dah tura min ngen laiin, hei aia tam daih hi kan dah. MLA fund chhuah hma hauha education atan 10% indil lâwk te, MLA fund tawrh ngei ngei tura budget lian tak awm si loa MLA fund an han ît ngawt maite hi a mak hle a, state dangah thleng ve tak maw?" a ti bawk.